LANDWIRTSCHAFT ERLIEWEN

Kanner wëssen hautdesdaags net méi vill iwwer d’Landwirtschaft. Si sinn déi Erwuesse vu muer, a genee hei sollte mir als Baueren usetzen! D’Landwirtschaft ass d’Grondlag vum Liewen, an dat musse mir de Kanner nees méi nobréngen, fir datt si d’Zesummenhäng an der Natur verstinn a Respekt virun hir hunn. D’Wuert Liewensmëttel beschreift genee dat, wat et ass: e Mëttel fir ze liewen! Dofir ass et fir d’Zukunft a fir de Ruff vun der Landwirtschaft immens wichteg, datt mir als Baueren eis Häff opmaachen, fir datt d’Kanner nees verstinn, wat Landwirtschaft ass! Doriwwer eraus ass och de Kontakt mat Déieren e ganz wichtegen Aspekt, well Déieren eng positiv a berouegend Wierkung op de Mënsch hunn! Déiere si Balsam fir d’Séil!

​Den direkte Kontakt tëschent de Baueren a Bauerefraen an de Schülerinnen a Schüler ass vun onschätzbarem Wäert. En erméiglecht, hautno ze erliewen, wou eis Liewensmëttel hierkommen, an en déift Verständnis fir d’Prozesser vun Natur an Ëmwelt ze entwéckelen. Et begéint ee sech perséinlech, an esou gëtt Vertraue geschaf an d’Bewosstsi fir d’Bedeitung vun der Landwirtschaft an eisem deegleche Liewe gestäerkt. Dës Erfarunge fërderen net nëmmen d’Wëssen iwwer eng nohalteg Produktioun, mee och de Respekt virun der Natur an de Mënschen, déi eis Liewensmëttel hierstellen.